أيام زمان ، أيام ما كانت الكهربة لسه داخله جديد البلد . الناس كانت بتفرش تحت لمبات عواميد النور وبيقعدو . زي نظام التسلية مش أكتر

وكان وجودها زي عدمها في ميت عزون أول ما دخلت لأن الاستفادة منها كانت شبه معدومة .

بعد كده بدأ الناس يشترو لمبات إنارة وبعدها الراديو و التسجيل و بعدها بشوية التليفزيون . كان فيه بيوت قليلة إللي فيها تليفزيون . وأعرف بيوت كان الناس الجيران بيتجمعو عند جارهم إللي عنده تليفزيون في معاد المسلسل " أيام زمان الناس غير الوقتي شوية "

بعد كده الناس اشترت تلاجات و غسالات أيام زمان .

الناس بدل ما كانت بتتعب كتير أصبحت بتتعب قليل .

الجيل الأجدد شوية بدأ يتربى على التليفزيون والمسلسلات وبدأ التليفزيون يبقى جزء من الروتين اليومي .

المهم عشان ما أطولش :

" تحولت الكهرباء من رفاهية إلى ضرورة من ضرورات الحياة " لدرجة أن قطع الكهرباء لمدة نصف ساعة قد يسبب الكآبة للكثيرين منا لاعتماد حياتنا المعاصرة على الكهرباء بشدة

برده : بدأنا نشوف الكمبيوترات في التليفزيونات بس " زي برنامج داتا داتا كمبيوتر لو حد فيكم فاكره " وبدأنا نشوف الكمبيوتر في البلد كان إللي عندهم كمبيوتر يتعدو على صوابع الإيد اليمين بس

بعد كده بدأنا نشتري كمبيوترات . استخدامنا له الأول كان إيه ؟ بسيط جدا . لكن اتطور لدرجة أننا اتعلقنا به زي ما الجيل إللي قبلنا اتعلق بالتليفزيون

ودخلنا عصر الانترنت . كان الأول لو عاوز تدخل على النت لازم تجيب كارت ب 10 جنيه مش فاكر كان فيه كام ساعة . بعدها سنترالنا بقه سبع أرقام . فكان كل إللي محتاجه علشان خاطر تدخل على النت هو كارت الفاكس و تتصل برقم زي 07775000 و الحساب يجمع . كان النت بطيء جدا . لكن طبعا كان له سحره . هو يعني النت الوقتي سريع ؟ النت الوقتي برضه مهما قلت لي هو بطيء بالنسبة للسرعات إللي متخيل أننا نوصل لها قريبا خلال سنوات بسيطة جدا . و تخيل أيام زمان كان عشان تفتح صفحة الرئيسية www.msn.com كنت تقعد شوية عما يفتح . يعني ما كنتش تقدر تنزل بأسرع من 5 كيلو بايت أو حاجة زي كده . بعد كده ظهر الدي إس إل في ميت عزون . ووصلت سرعة التنزيل إلى 18 و اترفعت ل 27 كيلو بايت " أقصد السرعة الفعلية " لأن أول دي إس إل في البلد كان سرعته " 128 كيلو بايت " خط واحد مشغل ميت عزون كلها . وكان ميه ميه

بصراحه ما أعرفش السرعة وصلت كام الوقتي " بالذات السرعة الفعلية "

وطبعا كل ما اترفعت السرعة كلما ازدادت الاستفادة من المالتيميديا من النت

فهل انت اتأثرت بالنت لما قطع ؟ إيه إللي بيمثله النت في حياتك الوقتي ؟

بتقعد عليه كتير ؟ بتستفيد من أي خدمات أكتر عليه ؟