بسم الله الرحمن الرحيم
الحمد لله رب العالمين والصلاة والسلام على أشرف المرسلين وعلى آله وصحبه أجمعين وبعد .
أخباركم
إيه ؟ النهارده هنبدأ في توثيق موضوع مهم حصل في ميت عزون . وهو ما يعرف
بـ ( شكلة الكهربه ) . وهأبدأ أجيب المعلومات إللي عندي وإللي هي مادة
صوتية و هأفرغها هنا مع تهذيبها . تم تسجيل المادة دي في مايو / 2005 .
الحوار كان مع أحد أبناء القرية إللي عاصرو الحدث من بدايته .
بسم الله الرحمن الرحيم
يقول أحد أبناء القرية . كنت معاصر للأحداث من أولها بحكم القرب من المكان . لكن مش فاكر السنة ولا الشهر .
البداية
للحادث أن احنا في الأرياف وقالو أن الكهربه نازله الأرياف و جايبين خط
الكهربه من ناحية دكرنس ، لقينا في يوم من الأيام فيه خط عليه جاي عليه من
بدين من بعدنا طالع لحد البحر . وبيكملو الخط من كوم بني مراس لعذبة سعد
الدين عشان يوصلو الضغط العالي لبدين ، عشان يعدّو المنطقة إللي إحنا فيها
الكوم والخليج وميت عزون . وسببه أن مدير الكهربه من بدين وحب يعمل خدمة
بلده فيجيب ضغط عالي من البحر لبدين ، رغم أن بعد نص كيلو فيه خط ضغط عالي
رايح على دبو عوام وميت عوام وشبرا وبدين . ده كان يوصل لبدين ، ده عمله
زياده مخصوص لبدين .
فإحنا لما شوفنا الوضع ده أنهم بيعملو العمدان في الغيطان ، منعناهم أنهم يعملوا العمدان إللي هتوصل هناك .
س :طب سؤال يعني منعتو مين ؟ يعني مثلا الحكومة ..
منعنا
العمال إللي جايين يركبو الخط . منعناهم كم مرة . وراحو مرة من عند أرض
صدقي هنا فوق مننا بشوية رحنا لهم هناك برضه ومنعناهم ، قبالنا هنا
منعناهم كم مرة . فجه البوليس حط في دماغه أن وجود مشايخ البلد والعمدة في
البلد هم دول إللي بيشجعو أهل البلد يطلعو يمنعو الناس دول . فجه في ليلة
من الليالي أخدو العمدة ومشايخ البلد حجزوهم في المركز بالليل . هنا ما
نعرفش ايه السبب ، المهم خدوهم . صبحنا الصبح جالنا خبر أن فيه عمال جايين
لنصب العمدان بالقوة .
جاي وبور حرت بمقطورته من بدين عليه أنفار
من بدين وعليه الأسمنت والسيبيا اللي بيرفعو عليه العمدان والسلك اللي
بيتعلق في العمود . فجه ارسال أن ناس من بدين جايين . فطلعنا شوية أنفار
وحريم على البحر ، فجات عربية أمن مركزي عدّت علينا وإحنا واقفين ، ووقفت
عن كوبّانية الكوم ونزلو هناك . هم هناك بيعدّلو نفسهم ولقينا الوبور
الحرت جاي بالانفار والاسمنت . الفرصة اللي نفدت الناس دول ( يعني ما
اخدوش بالهم منها ) ان عربية الامن المركزي عدّت الأول وهم بعدهم ، لو هم
عدّو قبل الامن المركزي ما كناش خدنا بالنا من الحكاية . فلما جات
المقطورة رمينا الأسمنت وبعترناهم والسيبيا في البحر ، وضربنا العمال .
لأن لو كانو كملوا ما كانتش الكهربه هتدخل بلدنا خالص بعد ده . لقينا
الأمن المركزي عامل أربعات تشكيل وبيزومو زي الصاعقة ( هيه – هيه ) قدامهم
ظابط مباحث اسمه مجر . احنا قلنا هنقف إزاي قدام الناس دول . طب نجري وللا
نقف ، طبعا ما فقناش لنفسنا إلا لما قربوا مننا لقينانا نزقل فيهم طوب لحد
ما أربعات التشكيل دي اتنكشت في بعضها ـ وبقه الشاطر إللي بقه يزق زميلهم
، والبنات والنساوين تسوط و إحنا نزقل طوب .
فحب الظابط يعمل
عملية أنه يهزمنا قدام الناس دول فناس راحو قدامه . وقال ايه طلباتكم ؟
الناس بدأوا يحكوا الحكاية يا بيه الحكاية كذا كذا .... فقنا لقينا الأمن
المركزي بيعدل وضعه ، و الظابط بيعطيهم إشارة عشان يحاوطونا عشان يقبضو
علينا كلنا . ففيه ناس مننا تانيين واخدين بالهم من العملية . ففيه واحد
كان معاه مسحه فراح على الظابط عاوز ينتشه بالمسحه بتاعته ، الظابط فلت
نفسه و حدف نفسه وسط القوة بتاعته وأمر القوة بتاعته أنها تضرب فينا
بالرصاص ... مش ذخيرة حية يعني ... حاجات تانية بتعور .... إللي هي الرش .
كام واحد عينه اتقلعت ، وكام واحدة عينها اتقلعت . و حولنا الأنفار تاخد
المتعوّر على مستشفى الخليج ، و الأنفار بتزيد مش بتقل هنا لحد ما أنفار
البلد وصلو لقبال الكوبانية بعد المصلية على البر الوسطاني على ترعة الكوم
، فيه انفار كانت بتجيب الجزم يكسرو بيها الحجارة البيضة و العيال تشيل
طوب في حجرهم من الطوب المتكسر ويوزعو على الناس اللي بتزقل . حتى ان
القوة دي سحبت نفسها وراحو قعدو عند الكوبانية تاني . بس هم في الظروف دي
ضربو ذخيرة حية . جات رصاصة في واحد من البلد اسمه عبد الفتاح رخا ( الله
يرحمه ) أخدوه لمستشفى دكرنس ومات .
خلي بالك أننا كنا محددين
مولد النبي ، كنا بنعمل عساكر وزفه وحرف كتير فيه وكان بيرسمو جولدمائير
وموشى ديان . فالراجل ده لما مات لغينا المولد لأن المولد كان معاده قريب
.
الظابط مبلغ المحافظة أن القوة إللي راحت ميت عزون للكهربه ميت
عزون أسروها . فلقينا عربيات مصفحة وقوات جامدة جايه من المنصورة ، كل ما
تعدي على بلد ، يقولو أن ميت عزون خلاص بقت تراب وكل اللي له قرايب في ميت
عزون ييجي ميت عزون لهم . فالقوة إللي جاية وقفت عند المصلية إللي عند
شتيوة كانت مصفحة ومدافع . حتى فيه عسكري بيقول لظابط ما يللا يا باشا
عشان الليل هيخش علينا عشان نلحق نعمل حاجة . فالظابط بيقول للعسكري “ أنت
ما عندكش عيال تخاف عليهم “ . فالظابط كان حكيم شوية ، كان مساعد مدير
الأمن . فالظابط ساب القوات وجه لواحده مشي . حتى عمك ..... .... راح يدعي
قرايبه في الكوم للمولد ، وهو رايح حوّد على الكوبانية فالقوة إللي هناك
كانت الطواقي إللي على راسهم مرمية وحالتهم حالة . فقال لهم يا جماعة
البلد دي بلد غلبانة ومالهاش دعوة بالكلام فارغ ده ، قامو قابضين عليه .
المهم
جه مساعد الأمن ده ، والناس لما شافوه وشافو انه جاب الناس بسياسة حلوة
لحد ما دخل البلد ، فسأل إيه الوضع صفته إيه وأنتم طلباتكم إيه ؟ فقالو له
الحكاية كلها من الأول . فمساعد مدير الأمن حب يمتص غضب الناس فوعدهم أن
الساعة 6 الصبح هتكون العمدان في بلدكم هنا ، وفعلا حصل واتزرعت العمدان
واتشدت السلوك وسرجنا قبل بدين هنا .
أسئلة تانية .
هل البلد استخدمت اسلحة تانية ؟
مفيش غير الطوب والبلد ماحليتهاش مسدس . وماحدش استخدم بنادق
سمعت أن كان فيه ظابط اتاخد في المضيفة ؟ ففيه ناس بيقولو مأخوذ أسير وناس بيقولو مأخوذ حماية لأنه موت الحاج عبده الله يرحمه ؟
لأ . ده كان ظابط النقطة ، كان بييجي عشان المشكلة .
يعني هل كنتم عارفين أن المشكلة كانت ممكن تتطور وتبقى مشكلة كبيرة مع الحكومة ؟
لا ، إحنا هنليح الحكومة ؟ لكن من المنظر .. إحنا حقنا وقلنا لازم ناخد حقنا لو هو إيه .
هل فيه ناس اتقضبو عليها ؟
آه .
ليه ؟
تهديد للبلد . حتى أخدو ناس ما طلعوش في الشكلة خالص .
يعني إمتى ؟
تاني
يوم . ده حتى تاني يوم رايحين المنصورة عشان إللي مات نجيبه ، بقه إللي
يروح ويقول أنا من ميت عزون بقو ياخدوه . لولا ناس اعضاء من مجلس الشعب
دخلناهم في الموضوع وطلعو لنا المتوفي ( الشهيد ) . ده حتى أنا كان لي أخ
ما طلعش على الميزانية خالص ومع ذلك راح المركز 4 ايام .
طلع بكفالة وللا إزاي ؟
أقول
لك بقه . كانو واخدين ناس كتير من البلد منهم الباشمهندس ...... .... فجم
أخدو أسئلتهم وكفالة ، فقالو مش دافعين . ولا رضو يدفعو خالص . قعدو
الاربع ايام مارضوش يدفعو كفالة فبعد الاربع ايام طلعوهم .
طب إيه إللي حصل بعد كده . هل حصل الصلح مع الحكومة ، هل حصلت قضية وبقه فيه محامي . يعني الوضع انتهى إزاي ؟
الوضع فعلا أننا أجرنا محاماه . وبعد كده ما اعرفش حاجة خصوصا ان فيه ناس ماتت بالذخيرة الحية .
هل فيه أشخاص مهمة جم البلد . سمعت أن تقريبا المحافظ جه بعدها البلد .
ده في مناسبه تانية .
لا
استنى ، جه ناس هنا ، والمحافظ جه هنا اتعمل له صوان في النادي . انت شوفت
القوة إللي قلت عليها . الأربعات تشكيل ، نزل أكتر منهم لحد الصوان ونزل
البلد واتكلم شوية ومشى .
ده بمناسبة الكهربه ؟
آي
هل كان فيه جمع للفلوس عشان المحامين ؟
أيوه التبرعات اشتغلت من تاني يوم وعشان الشهيد . كان المحامي اسمه محب القصبي ، محامي كبير .
طيب هنربط الموضوع ده بموضوع تاني هو الاحتفال بالمولد ، قبل حركة الكهربه ؟
كان
متحدد لأنه بيتحدد بالصييت والفرقة اللي هتيجي بالزفة . بس عشان خاطر إللي
مات ما عملناش احتفال ، وانتهى من سنتها الاحتفال بالمولد .
...............................................
نكمل مع بعض المواقف والطرائف المتعلقة بما بعد الشكلة في مرة جاية إن شاء الله
