بسم الله الرحمن الرحيم

الحمد لله والصلاة والسلام على رسول الله وعلى آله وصحبه ومن والاه ، وبعد

الموضوع ده مهم جدا جدا ويمكن من أهم الموضوعات على المنتدى كله ، ولو المنتدى كله ما أنجزش غيره يبقى يكفيه
التوثيق الرقمي لميت عزون .... يعني إيه ؟
أحب أبدأ من الندم ... نعم الندم على ما لم نستطع نحن إتمامه
فيه ناس بتعرف القيمة المستقبلية لشيء ، و أنا أعتبر نفسي من ضمنهم ، كنت أعرف قيمة كل صورة بأتصورها في وقتها وعارف أن لو قيمتها ما ظهرتش لي الوقتي فهتظهر لي بعد سنة أو اتنين أو تلاتة أو اربعة ... لازم هيكون ليها قيمة مستقبلية ... هتكون كنز
المهم ، فكنت عاوز أعمل توثيق للبلد بطريقة منظمة ، ففكرت أنا وبعض أصدقائي أننا نصور العادات الحالية - إللي البعض اتعود عليها وطالما اتعود عليها مش هيشوف قيمتها في الوقت الراهن - على سبيل المثال كنا عاوزن نسجل أذان الشيخ عبد الرزاق الله يرحمه ، لكن للأسف اتحرجنا أيامها ندخل الجامع ونسجل ، للأسف ، و كنا عاوزين نسجل العيد في الجامع الكبير و نسجل المواقف الطريفة إللي كنت أنت متعود على أنك تشوفها وإللي يمكن ما تعرفش قيمتها الوقتي زي إقامة صلاة العيد للشيخ عبد الرزاق ، و كلمته علشان الناس تقعد تسمع الخطبة ، و حتى ... الجامع الكبير نفسه إللي خلاص هيتجدد ... يعني كل شيء انتهى
مش هأطول كتيير لكن حبيت أفتح لكم الباب أمام الاقتراحات ... إيه إللي شايفين أننا ممكن نعمله علشان نوثق ميت عزون ونسطر نحن التاريخ ... يعني حضرتك ممكن تكون الجبرتي العزوني .
فمثلا أنا شايف أن يكون فيه قسم خاص بالتوثيق الرقمي لميت عزون وكل واحد يحاول يعمل موضوع بس يعمله صح . الموضوع مش هييجي من غير الإحساس بروح الجماعة ، و هيحتاج لتنسيق وتنظيم
طبعا الواحد على النت بيعرف جنسيات كتير ، ومن ضمن حبايبي واحد اسمه الاستاذ مشعل لما أعطيته موقع المنتدى قال لي " أنا عاوز أشوف ميت عزون ، أتعرف على ميت عزون ، بشوارعها و سوقها إللي بتحكي لي عنه و مدارسها " طبعا ما قدرتش أقول له إلا أن المنتدى عليه بعض الصور و أن اقتراحه بأن يكون فيه توثيق رقمي لميت عزون لمن أراد أن يعرف ميت عزون و معلومات عامة عنها هيكون موضع البحث و الدراسة وإن شاء الله هيتعمل.
سألني كم عدد سكان ميت عزون ... ما عرفتش أقول له
سألني ... هل فيه عندك صور للسوق بتاع بلدكم ... ما لقيتش ... مع أني لقيت عندي صور لميت عزون من 30 سنة
طبعا هأقتبس عبارة من عبارات ويكيبيديا " هذه بذرة مقال " يعني لو سمحتو .. بجد ... قولو اقتراحاتكم و إيه إللي ممكن نعمله ... هل ممكن نصور حاجة و نعد مقالات كويسة عن البلد للي عاوز يعرف عن تاريخها
ويا جماعة أنا عاوز أقول حاجة .... المنتدى احتوى الدور المفتقد في مركز الشباب .... احتوى السرعة المفتقدة في مجلة ميت عزون ... احتوى الألفة الافتراضية التي افتقناها على أرض الواقع
وربنا يجعل أعمالنا كلها خالصة لوجهه آمين