العواف .

طبعا الموضوع من عنوانه زي مواضيع كتير بأكتبها ما بيكونش العنوان جذاب . لأني ما بأعتمدش على انجذابك للعنوان قد ما بيهمني أنه يعبر على الفكرة نفسها .


و برضه من خلال الموضوع ممكن ناس تشوفه وما يعجبهاش . برضه مش مشكلة . المهم أكون علقت على شيء شايفه ، و تكون الفكرة وصلت :

الموضوع النهارده بيتكلم عن فرع من فروع الأمانة وهو أمانة النقل .

كان إللي بيميز علماء العرب أن كان عندهم أمانة في النقل ، يعني لما ينقلوا شيء ينسبه للكاتب ، عشان خاطر ما يلتبسش الأمر على الناس ويفتكروا أن الناقل هو الكاتب . و ده غلط

طب ليه الناقل ما بيشيرش للكاتب الأصلي للمقال بتاعه . ليه ؟

ده موضوع عاوز اسمع آراء المنصفين فيه ويقولو رأيهم بالأمانة .

هل لأنه يحب أن الناس تفتكر أنه الكاتب ؟

يبقى أضاع الأمانة . الأمانة العلمية مهمة في النقل . لازم تكون عندنا الثقافة دي .


المهم أن ربنا ذم في إللي بيحب يحمد بما لم يفعل . يعني يا إخواني رجاء من القلب من أخوكم أن إللي ينقل يا إما يشير إلى المقالة الأصلية أو أنه يقول منقول . لأن دي أمانة هيتحاسب عليها .

الأمانة العلمية في النقل مفتقدينها من بعض فئات الكتاب حاليا . لما يكون فيه مثلا كتاب ديني وتلاقي واحد مسح منه حاجات عشان خاطر ( فيه علّة في العقيدة ) وده كمثال في الدين . و المفروض أن الأمانة العلمية تقول أنك تنقل الكلام بالنص وبعدها تعلق عليه في الحاشية لو حبيت .

كذلك نلاقيها في القليل من أساتذة الجامعة إللي ممكن ياخد البحث من الطالب وينسبه لنفسه عشان ينال المجد و الشرف .

و ممكن تلاقيه في مصلحة حكومية معينة , تلاقي موظف عمل اقتراح خلّا الشغل أحسن . وتلاقي مدير الإدارة بيتكلم كأنه هو إللي حسّن الشغل و في نفس الوقت ياخد هو كل المجد و يضيع الموظف الصغير .

كلام كتير . و أنا إللي كان جوايا قلته فيا ريت تستحملوه . حتى لو مش هتردو عليه . المهم عندي الاقتناع وفقط .