بسم الله الرحمن الرحيم

الحمد لله رب العالمين والصلاة والسلام على أشرف المرسلين وعلى آله وصحبه أجمعين وبعد :

لو سألتك هل أنت فيك صفة السرقة ..... أكيد هتقول لأ ... بتاتا البته

طيب ... إمال هم بيقولو علينا حرامية ليه ؟

هتقول لي .... مين إللي بيقول عليّ حرامي وأنا هأقطع لسانه ؟!!!

أقول لك ... بسيطة ... أصل السرقة ما بقيتش زي زمان .

ندخل في الموضوع ....

هل أنت شايف أن نسخ البرامج يعتبر سرقة ... يعني البرامج إللي أنت ناسخها من غير ما تشتريها مع وجود حقوق طبع لها ... هل أنت شايف أن ده يعتبر سرقة ؟

لو كده يبقى نسخة الويندوز إللي عندنا في المحل وعليها نسخة الوورد إللي بأطبع عليه للناس وبآخد فلوس على كده ... تبقى فلوس حرام ؟!

هل أنت شايف أنك لما تصوّر كتاب له حقوق طبع ... وتستفيد من العلم إللي فيه .... هل أنت بتاخد وزر

هل أنت لما تجيب نسخة من اسطوانة برامج دينية وعليها قسم أن النسخة دي أصلية ... هل هتاخد حسنات وللا سيئات على الاسطوانة وكل حرف بتتعلمه منها ؟

ده لو العملية كده يبقى لو أنا عمري ما مديت إيدي لقرش حرام هأتحاسب على أني سرقت نسخة الويندوز ام كذا ألف مع بقية البرامج إللي عندي !

وفي الجانب الآخر ... مش كتم العلم حرام ؟!

هم الناس دول زعلانين ليه ... يعني إيه العقد شريعة المتعاقدين إللي بيقولوها دي .

طبعا الملكية الفكرية بتمتد لحاجات كتيرة قوي بس أنا جبت جانب منها وإللي عنده جانب تاني وللا حاجة يقوله

إيه رأيكم في الموضوع ده لأنه بجد موضوع مع أننا شايفينه بسيط إلا أنه ممكن يودينا في داهية زي ما قلت ... لو هو حرام يبقى عمري ما مديت إيدي لقرش حرام ومع ذلك بآكل من حرام وبأتعلم من حرام يبقى ربنا مش هيبارك لي في كل ده