موضوع: ياترى لو خدوا منك الجنيه وعطوك حاجة تانية, هتقبل؟ الخميس مايو 21, 2009 1:43 pm
النهارده الصبح قريت فى الجريدة مقالة بعنوان (العملة العربية الجديدة) وأكيد هتفهم من العنوان زى أنا ما فهمت انها هتكون عملة موحدة لجميع الدول العربية.
اللى أزعجنى ان العملة دى مقتصرة على دول الخليج بس يعنى لافيها مصر ولا السودان ولا سوريا ولا لبنان ولا.....................زى ماتعد بأه, زى ماتكون مصر وغيرها من الدول الغير خليجية مش معترف بيها كدول عربية أو ربما مش معترف بيها كدول من الأساس. ربما يكون بسبب الفقر اللى دولنا الغير خليجية غرقانة فيه؟ والله ممكن.
المهم, سيادته بيقول ان الامارات قررت انسحابها من مشروع العملة العربية ( أهو زى ماهما بيسموها) الموحدة وده أزعج باقى الدول العربية اللى بتسعى ورا الموضوع وهى السعودية والكويت وقطر. الله, ده طلعوا بيقصدوا بالدول العربية أربع دول بس؟ كده أنا اطمنت على بلدنا الحمد لله ان مش احنا بس اللى اتنسينا من ليستة البلاد العربية لأ ده فيه كمان دول خليجية منسية.
فى جريدة تانية قريت مقال تقريبا تقدر تقول انه قص ولصق أو كوبى وبيست (دى لاخوانا اللى محضروش القص واللصق) لكن الكاتب الفاضل كان محيره حاجة واحده بس فى الموضوع وهى ياترى اسم العملة الجديدة هيكون ايه؟ بصراحة سؤال صعب وبايخ فى نفس الوقت لكنى فكرت فيه شوية
دول الاتحاد الأوروبى ماغلبتش لما سميت عملتها الجديدة يورو, طبعا دى متسمية لوحدها لكن ياترى احنا كعرب (آسف أقصد ال3 دول الباقية بعد انسحاب الامارات) لو نجح مشروعهم هيسموا عملتهم ايه؟ السعودية وقطر عملتهم الريال والكويت عملتها الدينار وبعد غلب توصلت لحل يرضى جميع الأطراف وهو انهم ياخدوا معاهم مصر بعملتها الجنيه وبلد زى سوريا بعملتها الليرة وبكده تبقى العملة الجديدة فعلا عملة عربية وليست جزء من خليجية, لكن برده هيكون اسمها ايه؟
جنيه مصرى +ريال سعودى أو قطرى + دينار كويتى + ليرة سورية = ايه؟ لو خدت أول حرف من كل عملة فى الأربع عملات هتجمع أربع حروف والأربع حروف ممكن يطلع منهم جردل وبكده يبقى أنا حليت مشكلة اسم العملة العربية الموحدة بس دلوقتى انت ممكن تروح للبقال تقوله ادينى خمستين فى عشرة لكن بعد كده هتقوله ادينى (ايه) فى جردل؟ الموضوع الأصلي : ياترى لو خدوا منك الجنيه وعطوك حاجة تانية, هتقبل؟ المصدر : منتدى ميت عزون www.meetazoon.com
موضوع: أمنيه وياريت تتحقق الخميس مايو 21, 2009 2:26 pm
مع احترامى لرأى حضرتك يا أبو فهد لكن ..... إحنا كعرب مينفعشى يبقى لنا عمله موحده فى الوقت الحالى وهقول لحضرتك ليه 1- أولا الدول المعنيه اللى حضرتك ذكرتها هى دول مجلس التعاون الخليجى وده مجلس مستقل عن الجامعه العربيه لكن ممكن يرفع توصيات لها والمجلس ده حاليا فعال جدا وناجح لأن قراراته تنفذ وساريه على كل الدول المشتركه فيه بعكس الجامعه العربيه اللى فيها إختلاف حتى على البند الواحد فى مسوده طويله 2- الدول دى مش ضمنها اليمن مع انها بتنتمى لشبه الجزيره العربيه.... بسبب المستوى الإقتصادى بالطبع وهى دوله عربيه برضه 3- الدول العربيه مجمعه متقدرشى تعمل كده لأن فيه تباين فى المستوى الإقتصادى اول شئ وبعد المسافات بمعنى إن مواطنى دول مجلس التعاون بيقدروا يتحركوا بسهوله بس بالبطاقه الشخصيه لكن كباقى العرب متقدرشى تدخل دوله خليجيه بدون تأشيره من السفاره 4- السعوديه بل معظم دول الخليج بيعتبروا إن المصريين وغيرهم من العماله أجانب !!!!!!!!!!! مع إنهم بيتكلموا عربى 5- لحد دلوقتى وده على أرض الواقع مفيش سوق عربيه مشتركه بعكس دول مجلس التعاون .........يعنى إن شاء الله يبقى عندنا أمل ويتحقق ده بعدين شكرا على مقال حضرتك الرائع تقبل المرور
موضوع: رد: ياترى لو خدوا منك الجنيه وعطوك حاجة تانية, هتقبل؟ الخميس مايو 21, 2009 10:52 pm
أبو فهد ... دايما بتعرض قضايا كبيرة بأسلوبك الساخر الجميل
بس عندي كذا اقتراح
الأول اقتراح للرد على المتحيّر في تسمية العملة العربية الجديدة
ممكن نسميها ساسونا زي ما قالت عليها زكيا زكريا
وللا تسميها زي نشرة أخبار الخامسة والعشرين العملة الموحدة عروبو
أما بالنسبة لموضوع الجردل ... لما نضم ليه كافة أعضاء جامعة الدول العربية هنلاقي حل
هأقول له ادّيني مقطفين في جردل ... هتقول لي جبت منين مقطفين دي .... هأقول لك .... نراجع عمليتك الحسابية جنيه + ريال + دينار + ليره = جردل مصر + قطر + طرابلس + فلسطين = مقطف
طبعا علشان ما حدش يقول لي هو فيه ليره في فلسطين ... هأقول أن الفلسطينيين بيستعملو الشيكل والأجورا الاسرائيلية ، وإحنا مقاطعين ، ولحد ما يبقى فيه دولة فلسطينية لها عملتها هناخد بالعملة في مخيمات اللاجئين الفلسطينيين في لبنان " الليرة " علشان ما حدش يزعل يبقى لما تروح تفك الجردل ممكن تجيب مقطفين في جردل
موضوع: رد: ياترى لو خدوا منك الجنيه وعطوك حاجة تانية, هتقبل؟ الخميس مايو 21, 2009 11:06 pm
طبعا أرد الوقتي
فين أيام عبد الملك بن مروان إللي صكّ أول عملة عربية ... الدينار العربي وفكّ ارتباط اقتصاد الدولة الأموية عن الدولة البيزنطية
بصراحة أنا مش متفائل أن الوضع الحالي يتحسن لأني مش شايف حد بيحاول يحرك المياه الراكده إلا فيما ندر ، زي مثلا القمة الاقتصادية العربية إللي فاتت والله أعلم هيطلعو منها بإيه ؟
العالم العربي منقسم على نفسه ما بين دول مجلس التعاون الخليجي في الشرق وما بين دول الاتحاد المغاربي في الغرب وما بين محاور اعتدال و ممانعة " مع تحفظي الشديد على التعبير الكاذب الأخير " و في كل هذا تضيع هيبة جامعة الدول العربية . ويضيع ما بين مبادرات الشرق الأوسط الكبير وما بين الكوييز وما بين التطبيع التجاري العلني مثل ما حدث بين الدوحة وتل أبيب . ويضيع أيضا ما بين الاتحاد اليورو متوسطي
الخميس مايو 21, 2009 1:43 pm
الموضوع الأصلي : 
الكلمات الدلالية 
رابط الموضوع 
HTML كود الموضوع