بشرى مش ساره : السجاير غليت والحشيش رخص

تاريخ التسجيل : 03/05/2009

بسم الله الرحمن الرحيم
بعد السلام عليكم ورحمه الله وبركاته
بشرى ساره (( زى ما بيكتبوا فى ورق الدعايه ))
بشرى ساره : لكل المدخنين السجاير غليت
أكيد بتقولوا عليا أنى عبيط عشان بقول بشررى مش ساره وبقول عليها أنها ساره ركزوا معايا بس
السجاير غليت والحشيش رخص
اه والله غليت ... العلبه البوكس اللى هى السجاير المحليه بقت ب اربعه جنيه ونص وفى ناس بتبيعها ب5 جنيه بعد أما كانت ب3وربع يعنى غليت بنسبه 30% العلبه الروزمان بقت ب7.50 بالصلاه على النبى بعد أما كانت ب6 جنيه يعنى غليت بنسبه 25% وهكذا بقى الأل أم ب7 جنيه بعد أما كانت ب5 جنيه يعنى زادت 28%
وطبعآ بدوره غلى المعسل والشيشه غليت بقى الحجر بأتنين جنيه ونص لان ورقه المعسل بقت ب5 جنيه
كل ده فجأه .. يعنى مطلعش بطرس غالى (( وزير الماليه )) وقال معلش يا تيتو انتا وكوكى بكره أن شاء الله هنغلى السجاير لو عايزين تشتروا شويه وتخزنوهم ولا حاجه .. ولا طلع مجلس الشغب وهوه بيعتمد الميزانيه وقال أن فى عجر حصل فجأه عشان الريس كان بيتعالج والوزرا راحوله بكيسين برتقال وموز وده كلف الميزانيه فلوس كتيره وعمل عجز فى الميزانيه فهنضطر نغلى اسعار السلع الغير استهلاكيه عشان نغطى العجز اللى فى الميزانيه ده عشان عمو جمال يقدر يطلع يصيف فى فرنسا زى كل سنه والا طنط جيهان الجمال (( مراته )) تزعل وتنيمه على الكنبه
كل ده محصلش .. يعنى على سبيل المثال أنا مواطن مصرى عرفت عن طريق واحد صاحبى شغال فى كافتريا وانا معادى وراح منادالى وراح قايلى (( ايه ياعم اللى بيحصل فى البلد ده )) طبعآ هوه سألنى عشان شايفنى رايح جى قدامه وجرنال المصرى اليوم فى ايديا قالك بس ده عارف كل حاجه فى البلد قولتله ايه اللى حصل وراح قايلى كل اللى أنا قولته فوق ده طبعآ انا عنيا برقت قولتله ياااااااه للدرجادى وأحنا منعرفش ولا حتى كان مكتوب فى المصرى اليوم النهارده ولا على موقع الحزب الوطنى أمال هنعرف أزااى ؟ ويارتى نصدق أن البياعين مش بيشتغلونا أزااى ؟ كل ده لأنى عارف أن البند التالت من قانون حمايه المستهلك الفقره(( ج )) بتقول ان مينفعش تزيد سعر أى سلعه بدون الاعلان الرسمى عن سعرها الجديد منعا لتعرض المستهلك لجشع التجار طيب أول حاجه أهوه أن فى غلط فى تطبيق فى تنفيذ قرار زياده اسعار السجاير
ثانيآ بقى وده الأهم : بأى حق يتم زياده أسعار السجاير ؟؟ .. انا ضد السجاير اصلآ وضد المدخنين (( اللى أنا كنت فى يوم من الأيام واحد منهم والحمد لله )) بس أشمعنى كل اما الحكومه تحب تصيف تغلى السجاير ليه مش بتقلل نفقاتها زى مواكب الوزرا وأقامه الريس فى شرم الشيخ وكل وزير عايز يطمن عليه وطياره رايحه وطياره راجعه وكلها على حساب المواطن الزبون اللى بيشترى (( 6 سجاير فرط )) فى 143 طريقه يمكن تغطيه بيها عجز الميزانيه وده اتقال فى أخر جلسه لمجلس الشعب اشمعنى السجاير يعنى ؟؟ ما الوزرا بيشربوا سجاير ؟؟ ليه بيجوا على الحاجه اللى بتطلع الناس غلبها ليه مش بيغلوا بنزين 92 بتاع الاغنيا ولا ليه مش بيزودوا أجراءات العلاج على نفقه الدوله للأغنياء زى اللى حصل مع كمال الشاذلى ومراته وبنته اتعالجوا فى أمريكا على نفقه الدوله على الرغم أن كمال الشاذلى ده من الناس اللى قلبها فلوس تلبس القلعه حرير ليييييييييه؟
الطريف ان النهارده مكتوب فى المصرى اليوم أن اسعار مخدر الحشيش بدأت فى التنازل وبدأ أعادته تداوله بسهوله زى الاول وتوافره فى السوق المصر (( بحبك أوى يا مصر ))
خلونا أطرح عليكوا سؤال مش هيحصل :
لو أنتا وزير الماليه وحصل عجز فى ميزانيه مصر هتفادى العجز ده أزاى ؟
ولو أنتا مدخن ايه قرارك بعد زياده اسعار السجاير ؟
مش مستنى اى رد سطحى
كلمه أخيره
انا بطلت سجاير من 5 ايام يعنى يوم 28/06/2010 وتعمدت أكتبه عشان الحمد لله قررت أنى مش هرجعلها تانى أدعولى
تصثغؤبولكقج (( يعنى سلام بس باللغه التيتاويه ))

منتدى شباب ميت عزون /><!--
بداية قالب الموضوع الاصلي - www.meetazoon.com --><br /><font color=

الموضوع الأصلي : بشرى مش ساره : السجاير غليت والحشيش رخص المصدر : منتدى ميت عزون www.meetazoon.com

أنشر الموضوع لأصحابك على الفيسبوك

توقيع: اسلام حماقي