وقفة مصرية ... نحكم عقلنـا .. نتجنن كلنا.

تاريخ التسجيل : 14/06/2009

وقفة مصرية رقم 1 : نحكم عقلنا نتعلم كلنا :

المكان : مدرسة ثانوية مشتركة

الزمان : أي شهر من شهور الدراسة

الأحداث : الناظر بيلف على الفصول, المشرفين خلاص مبقاش يفرق معاهم يحذروا الفصول عشان يظبطوا نفسهم, المهم, دخل فصل, لقى مدرس عربي بيكتب على الصبورة, عايز يعلم الولاد لغة القرآن و اللغة 'الرسمية' للبلد بس مفيش حد في الفصل خالص, أو فيه بس اللي نايم, و اللي بيشرب بانجو, أو واحد رجله اتكسرت و مش عارف يروح حتة, و فيه اللي بيظبط مع الجنس الناعم, و اللي بيلعبوا كوتشينة, و فيه اللي حامل و فيه اللي بتولد و واخدة أجازة وضع من الفصل, قشطة يعني.. الراجل ملقاش حاجة يعملها طلع يبص على الحوش, لقى فيه خناقة تحت, بالمطاوي و السنج, ياااااه تاني, مش لسة متخانقة إمبارح العيال دي؟ ما علينا, ضرب وشه ناحية الكانتين لقى اتنين ماسكين في هدوم بعض, أتاري واد جاب 50 جنيه مزورة أول إمبارح و اشترى بيها كل اللي عايزه فبتاع الكانتين بيصفي حسابه معاه (والله حصلت في مدرستي بس اتمسك في الآخر, بس برضه ضحك على البواب و قال له فكّلي الخمسين و أخد الفكة و روح). ما علينا, قال يلف تاني يشوف أي فصل تاني, دخل الفصل اللي جمبه, حصة إنجليزي, المدرس بيتكلم إنجليزية في منتهى الركاكة, مخارج الحروف ضايعة و شغال بنظام البي تقيلة و خفيفة (دا بقى أساس في التعليم المصري) و مفيش كلمة على الصبورة مكتوبة صح و العيال اللي حاضر منهم عمال يقول وراه و الاتنين أضيع من بعض في الإنزليجي, يللا قشطة, اللي بعده, حصة دراسات إجتماعية, بص على الصبورة اتخض, إيه دا كله, شعوب العالم كلها مترصصة, و لازم كل عاداتهم و تقاليدهم و مواردهم تتحفظ, قال كفاية كدة, و رجع مكتبه, جه يحكم عقله, معرفش, قام نام, أصله مش لاقي حاجة يعملها.

وقفة مصرية رقم 2 : نحكم عقلنا نشبع كلنا :

المكان : فرن عيش بلدي في أي حي في مصر

الزمان : من مطلع النهار لحد آخره

الأحداث : صحي الحاج حسن, قام يتوضى و يجهز عشان ينزل يصلي الفجر في الجامع, مراته قالتله و انت راجع ابقى هاتلنا عيش من الفرن عشان العيش اللي عندنا خلص كله, 'من عيني يا أم أحمد, يللا السلام عليكم', نزل للجامع, دخل صلى الفجر, و قعد يقرأ شوية قرآن, و بعدين راح الفرن عشان يجيب العيش, بص لقى طابور عملاق, واقف فيه بتاع 100 واحد, توكل على الله و وقف في الطابور, فييييييييين بعد 3 ساعات وصل للشباك, 'هاتلي بـ3 جنيه عيش يا بني', 'ما ينفعش يا عم, هو بجنيه واحد آخرك, معندناش دقيق كفاية (أصل إحنا هربنا تلت إربعه)', ' ماشي يابني, هاتلي بجنيه', شال العشرين رغيف المشوهين (فيهم البيضاوي الشكل و المربع, و والمستطيل, فن فن يعني) و مشي يروح للبيت, 'اتأخرت أوي, زمانهم جاعوا, بس مش ذنبي, الحمد لله على الأقل جبت العيش', وصل للشارع اللي فيه بيته, بيته أهه في وسط الشارع, و فجأة حس بخبطة رهيبة و حس بواحد بيخطف العيش من إيده, اتخطف ثانيتين كدة و بعدها فاق, شاف اللي سرقه بيجري قدامه, جمع كل عزيمته و طلع يجري وراه, 'حرام عليك يا أخي دا أكل عيال قد ولادك', حصله, مسكه من كتفه, راح التاني لافف و مديله مطواة في صدره, وقع الحاج حسن الطيب غرقان في دمه, و قعد يعيط, مش عشان اتسرق, عيط عشان مش مصدق انت واحد قتله على عشرين رغيف, على جنيه.. لو كان سأله كان إداله الجنيه,'يللا الحمد لله إني صليت الفجر', جه يحكم عقله, مقدرش , راح غمض عينيه و مات شهيد, و كان كل اللي في نفسه يأكل ولاده الفطار..

وقفة مصرية رقم 3 : نحكم عقلنا نشتغل كلنا :

المكان : المقر الرئيسي لشركة كبرى

الزمان : الساعة 10 الصبح

الأحداث : مدير الشركة بيكلم مدير شئون العاملين, 'بقولك يا أستاذ سنتريسي, العيال الجديدة اللي جاية الـInterview بتاع الشغلانة الجديدة, أنا عايزك تقضيهم كدة بسرعة, هو كدة كدة أصلاً الشغلانة رايحة لأحمد النمساوي بيه ابن عضو مجلس الإدارة, بس أهو برضه نكمل الشكليات عشان يبقى عملنا اللي علينا', 'اللي تأمر بيه سعادتك', نروح دلوقتي بقى للأودة اللي مستنيين فيها الشباب المتقدم على الوظيفة, الناس كلها قاعدة عادية و فيه واحد في الركنة كدة مكشر, كله عمل المقابلة مبقاش غيره هو و 3 كمان, 'الأستاذ أحمد المصري يتفضل!', دوره جه, بيكلم نفسه, 'يللا يا بني, إن شاء الله الشغلانة بتاعتك, انت متعبتش السنين دي كلها و مطلعتش الأول على الدفعة و رفضت تعيين الجامعة و أخدت كل الكورسات دي و اتعلمت كل اللغات دي عشان تترفض هنا, أكيد أصلاً مش هتطول, أكيد فيك كل حاجة عايزينها, أمال مش الأول, يا رب!', دخل الأودة, قعد قدام الراجل, 'همم, و انت عايز تشتغل معانا ليه يا أحمد؟', 'عشان الشركة دي سمعتها كويسة جداً حوالين العالم, و الوظيفة دي بتناسب طموحي و أنا حاسس إني هلاقي نفسي هنا', 'ما شاء الله يابني, أتاريك الأول على دفعتك, تمام تمام, طب بص, إحنا معانا تليفونك, لو اتقبلت هنكلمك كمان أسبوع كدة, بالتوفيق إن شاء الله', ويفكر تاني, 'تمااااااام, الحمد لله, في جيبي إن شاء الله, في جييييييييبي', أسبوع, أسبوعين, ولا أي حاجة, 'يا ترى أنا اترفضت ليه؟ فيه حد أحسن مني في المجال؟ إزاي و أنا الأول عليه؟', جه يحكم عقله, ما جتش معاه, بس أخيراً جاتله الفكرة! : 'أمري لله, من بكرة أنزل أسأل الواد ميمو يمكن يشغلني معاه في محل البلاي ستيشن بتاعه'..

وقفة مصرية رقم 4 : نحكم عقلنا نشرب كلنا

المكان : نهر النيل

الزمان : أي ثانية في الـ86400 ثانية اللي في الـ24 ساعة.

الأحداث : اتنين حبيبة ماشيين على كوبري عباس/قصر النيل/أي كوبري في المنطقة بيعدي فوق النيل, بياكلوا درة مشوي, خلصوا أكل, مش معقولة هيمشوا بكوز درة في إيديهم, يا شيخ إرمي في النيل هو كان بتاع أهالينا... واقف جبمهم واحد بتاع لب, يبيع للناس الناس تقزقز و تتفتف في النيل برضه, دا في القاهرة, نطلع فوق شوية في النيل أو ننزل تحت شوية, هتلاقي ناس بتستحمي في النيل, ناس لا مؤاخذه بتــ.. همم.. بتصرف في النيل, ناس بتغسل مواعينها في النيل, و ناس بتحمي حيواناتها في النيل, و في ناس بترمي الحيوانات الميتة في النيل كمان. أصل النيل هبة للمصريين زي ما انت شايف.

وقفة مصرية رقم 5 : قبل ما تزيد مولود اتأكد إنه حقه علينا موجود

دي بقى مش محتاجة لا مكان ولا زمان, حرام عليكم يا أوساخ... قال إتأكد إنه حقه موجود قال, الكلام سهل أصله, هو أصلاً الواحد متأكد من حقه في الدنيا؟ أي حد فينا ممكن يموت في أي لحظة في أي حادثة, ممكن تشيلك عربية في أي لحظة من حياتك, ممكن البوتاجاز ينفجر في وشك, ممكن تقع عليك بلكونة, فعلاً فعلاً انت ممكن تودع أي لحظة و انت أصلاً كمان مش ضامن رزقك, كله على الله, ربنا هو اللي ضامنلك رزقك اللي هتاخده هتاخده, و هيضمن رزق المولود كمان, في ظروف البلد الوسخة (الظروف مش البلد) دي انت كدة كإنك بتدعوا لعدم الإنجاب أساساً, إذا كان معظم الشعب مش ضامن إنه يتعشى بالليل, هيضمن يأكل عياله بقى بالمبدأ دا؟ الرزق على الله يا أولاد المتخلفين.. حرام عليكم بقى... بصوا ولو لمرة في الشارع بجد و اعملوا حاجة مفيدة بدل الشعارات المتخلفة يا أولاد الكلاب.... معلش أنا شتمت كتير بس أنا أصلي متعصب..

وقفة مصرية رقم 6 : نحكم عقلنا نستريح كلنا :

تسلم يا ريس يا كبييييييييييير , عيب عليك مستريحين, في الدار الآخرة إن شاء الله

منتدى شباب ميت عزون /><!--
بداية قالب الموضوع الاصلي - www.meetazoon.com --><br /><font color=

الموضوع الأصلي : وقفة مصرية ... نحكم عقلنـا .. نتجنن كلنا. المصدر : منتدى ميت عزون www.meetazoon.com

أنشر الموضوع لأصحابك على الفيسبوك

توقيع: الورده مريومه

تاريخ التسجيل : 20/04/2009

هلا بيكي مريومه
منوره المنتدي
اولا: اود ان احييكي علي جرائتك الماتناهية ، ثانيا: اود ان اقول لك ان الشعب المصري يستاهل اللي

بيحصل فيه. و اليك بعض الامثلة مثلا غلو الاسعار و الاعلان التلفزيوني الشهير بتاع الست فشخرة هانم -

شوفت الناس بتشيل و تعبي اكياس الارز و اللحمة و ... قبل ايام رمضان وكأن رمضان تحول الي اكل

ووجبات بالرغم من ان الاسعار ارتفعت واللهي بيتنا لوحده كان صرف الوفات في رمضان ياحسرتااااااه

طبعا هتقولي هنعمل ايه مش اكل وغيره

عارف بس ليه نشتري بالكثره ياستي اليوم بيومه لينا رب هيفتكرنا مش مهم لحمه جزارين

طيب فكري معايا اذا الناس الناس بطلت تشتري اللحمة (اللي اصلا

احنا مبنشفهاش) بعد غلو اسعارها الرهيب ايه اللي حيحصل؟ اكيد الجزارين حيقعدوا ينشوا و بعدين

حيرخصوا اللحمة وتبقي في ايه الشعب (يا رب) و قيسي علي كدة معظم الاشياء مثل اجرة المواصلات اللي

كل يوم في الطالع وغيرها الكثير ونعم زي عصر عبد الناصر لما وقفوا شراء اللحمه ونزلت اسعارها

واللهي احنا بطلنا نشتري لحمه كفايه علينا الضحيه كويس اوووي

. في النهاية انا ليس مع الحكومة واللي بتعمله و لكن الشعب بيحب يستغل

بعضه ، فلو ان كل واحد فينا فكر ان هناك رب مطلع علي اعماله و يخاف ربنا في لقمة عيشه و ادي عمله

كما ينبغي ان يكون والله الحال حينصلع و العيشة حتبقي زي الفل ان شاء الله

تقبلي مروري مريومه