ربنا يحميك

اجاباتك في منتهي الدقه

انا هستمتع بحديثك علي الكرسي

بس عندي سؤال حاسه دائما انك بتحب المنتدي السبب

سر عطائك ليه

ايه رايك في الاعضاء الجديده اللي بتهدد المنتدي
كلمه تحب ترددها

السلام عليكم ورحمه الله

وعليكم السلام ورحمة الله وبركاته

استلم جواب البريد ده...وعاوز رد له ع العنوان ادناه

طب أوقع على الاستلام ؟

بسم الله

ليه غيرت اسمك ف الاول الي ضياء الحق؟ وليه الاسم ده بالذات؟

أنا ما غيرتش اسمي إلى ضياء الحق ، اسمي من أول ما دخلت هو ضياء الحق ، لكن غيرته بعد كده إلى DR/salahaldin بسبب أن كل ما اتصل بحد من البلد يقول لي ازيك يا ضياء الحق ، وكان فيه كلام كتير وسؤال مين هو ضياء الحق ، افتكرت أني اتعرفت فقلت أقطع الشك باليقين . ودي كانت غلطة ، لأن اتضح لي بعدها أن كل الكلام مجرد تخمين مش مؤكد . وكنت أتمنى أني افضل فقط ضياء الحق .

ليه ضياء الحق / أولا لأني كنت أحب أبقى مخفي مش معروف ، ليه ضياء الحق بالذات . بيتهيأ لي أن ضياء الحق اسمه ضياء و الحق ، ومعنى الاسم قريب من صلاح الدين .

أحب أنقل لك من بطاقة تعارفي من موضوع ( عرف نفسك ) . طبعا ده أول ما دخلت على المنتدى .


الاسم المستعار : ضياء الحق
لماذا الاسم المستعار بالذات : لأني أتمنى أن أكون ضياء للحق لا مطفئا لشموعه


احسن موقف قابلك ف الغربه؟

لما اشتغلت ، ولما مسكت التذكرة عشان انزل مصر .

مو قف زعلك او ضايقك ف الغربه؟
شايف حاجه ف الكويت احسن من مصر؟ باعتبارك هناك

موقف وحش ..... لما يضحك عليك مصري زيك

ولو قارنت بين مصر والكويت ، هنا ناس كتير بيحبو مصر ، وزمايلي في الشغل تلاقي لهم شقق في مصر وبيزنس كمان ، وبينزلو مصر يمكن مرتين تلاتة في السنة ، وإللي بيحبو مصر هم الأغلبية .

ايه الاحسن ؟ من ناحية الشغل يعني وللا ايه ؟

أنا عندك زي ما شوفتني ، ما كنتش بأقعد في البيت ، حتى في الأجازة إللي فاتت ، كنت بأروح ساعة الأكل والنوم والباقي مع حبايبي ، هنا ما بأطلعش من البيت إلا للطلب ، ممكن ما اطلعش يوم كامل نهائيا . ليه ؟ ده فرق .

من ناحية التخطيط العمراني والبنية التحتية هنا أفضل لأن المدن مبنية من الصفر ، بالظبط زي المدن الجديدة في مصر .

من ناحية الوقت ، فهنا العمر ممكن يجري بيك وما تحسش ، وبالتالي هيفوتك كتير ،

من الآخر ، هتنبهر بها شوية أول ما تطلع ، ويمكن تندمج فيها طول عمرك ، لكن بعد فترة هتعرف قيمة مصر .

لو خيروك تعيش هناك ولا ف مصر؟ ايه ردك

مصر يا عم ، مش محتاجة سؤال ... أنا زمايلي في الشغل بأقول لهم مش هأطول هنا وهم بيقولو هتطول ، ربنا يسهل وما اطولش

لو عجيتك بنت ف الكويت؟هل هتخطبها؟

عجبتني ؟ مش عارف ، ده يعتمد على أني أساسا اختلط ببنات هنا !

لكن أوضح شوية حاجات ... أولا الخطوبة دي قسمة ونصيب ، وكل واحد يقعد يفصل واحدة على مقاسة بمواصفات معينة ، وبرضه مش هياخد إلا نصيبه ... ممكن حاجة غير اللي كان مخطط لها

ثانيا / بالنسبة لوجهة نظري ، أن بنت متربية بره مصر أو في مدينة معناها بنت مرفهة ، ما اتبهدلتش بالقدر الكافي إللي تخليها تعيش معايا في ميت عزون بعد خمس سنين أو عشر سنين .

العكس بقه ، بنت من قرية تقدر تعيش معاك في قرية أو في مدينة . عندها القابلية لكده .

أرجع أفكرك ، أن كل الكلام ده نظري لكن ممكن تقابل واحدة وتلاقيك اتشنكلت يا معلم وخطبتها . ليه ؟ نصيــــــــب .

اخبارك ايه ف معامله الناس؟

قصدك أنا بأعامل الناس إزاي وللا الناس بتعاملني ازاي ؟ لأن المصدر ( معاملة ) مش موضح

لو الناس .. ففيهم الحلو وفيهم الوحش ، وفيه الراجل إللي يسد ، وفيهم إللي بيدور على مصلحته ، وفيه إللي تخدمه وساعة ما تحصل مشكلة بيتنصل من الخدمة دي ويقول ... هو إللي عملها .

في الشغل لازم تكسب زمايلك ، وبالنسبة للي هتتعامل معاه إللي جاي عشان تخدمه ، لازم تقابله بابتسامة وود ، لأن أنت مش أحسن منه ، ودي الغلطة إللي بأشوفها من بعض الناس . في دماغهم أنه عشان مسئول يبقى يكشر في وش الناس . النظرية دي انتهت .

لازم تكسب اللي قدامك . وبرضه لازم تفضل هيبتك موجودة .

ايه اكتر شخصيه حبتها...ومازلت بتحبها؟

أكتر شخصية حبتها ، وما زلت بأحبها ..... ما أقدرش أقول هو مين لكن هو عارف نفسه . هو أخويا وأكتر وأنا أخوه وأكتر ، وبأمدحه قدام الناس هنا على الرغم أنهم ما يعرفهوش ، وكنت منبهر به ، ومازلت منبهر به ..... وربنا يديم الود بيني وبينه .

شخصية ما قابلتش أذكى منها في ميت عزون ، ولا مصر ، ولا في الكويت . وأنا أعرفه أكتر من ناس كتير ، أعرفه بجد .

ماهو مثلك الاعلي ف الحياه؟

ما قلنا ، أولا سيدنا محمد لازم يكون المثل الأعلى ، من هديه نتعلم الأخلاق والتعامل مع الناس وكيف نصل إلى الله

لكن انا تركيبتي ما جاتش من واحد معين ، تركيبتي جات من ناس كتيرة قعدت معاهم ، كنت بأقعد مع إللي أكبر مني وبأستفيد من تخصص كل واحد .

اكتر واد دخل دماغك ف المنتدي؟

ايه السؤال المحرج ده . برضه ما ينفعش أقول حد بعينه لأني هأظلم الباقي ، يا أخي هو يعني يا أبيض يا أسود ... والله فيه ألوان ، بين الأبيض والأسود يوجد الأحمر و الأخضر والأزرق بدرجاتهم RGB يعني وكله ألوان


ايه اللي بضايقك احيانا من المنتدي؟

بصراحة يعني ؟ لما حد يتعصب لرأيه وما يدخلش للمناقشة لكن يدخل للمجادلة وزي ما يكون بيقول ( هو كده وخلاص ) - وكنت بأزعل لما تحصل مشاكل ، بأتضايق جدا .

ليه الصوره دي اللي وضعتها ف توقيعك؟

الصورة دي هي صورة عين الصقر ، وده صاروخ إنتاج مصري مضاد للطائرات وهو تحسين لمنظومة SAM 7 ويكفي اسمه ( عين الصقر ) ، وبصراحه لأني بأعشق مصر ، وأعرف قيمتها وأعرف أن القادم أجمل لمصر ، لكن محتاج جهود المجتمع المدني ( إللي هو احنا ) عشان نوصل

تاني ليه الصورة : شوية رموز في بعض

الأول شوف الجندي المصري إللي شايل المنظومة ، بتدل على أننا بنقول أن 67 مش هتتكرر تاني ، ولّى زمن الهزائم إلى غير رجعة والباقي زمن الانتصارات إن شاء الله ،

ولأن الصورة بتقول أن المصري لما يحب يصنع هيصنع ، وعين الصقر مثال على كده ، وغيره كتير لو حبيت أقول لك .

فهي صورة وطنية من نواحي كتير ، ما تفكرش أنها مجرد صورة .

خد الصورة دي كمان واعرف أن فيه جيش لمصر يحميها ، ويا ريت تكون عندنا الوطنية إللي عند الجنود دول



اتعلمت ايه من خبرتك ف الحياه؟

اتعلمت ايه من الحياة ده مواضيع مش موضوع ،

لكن اسمع يا سيدي باختصار وإللي هييجي على بالي

اتعلمت أن في النهاية هأموت ، ولو أنا اتعلمت كده يبقى يكفيني ، بس لما أتعلم فعلا يعني إيه هأموت وإيه النتائج المترتبة على موتي وايه المفروض اعمله بقه عشان هأموت .

اتعلمت أن الحياة أكبر مني ، انا شايف الحياة على أنها قصة أنا بطلها ، وكلنا شايفين كده ، أن السيناريو كله داير حوالينا إحنا وبس ، لكن إحنا جزء في الحياة جزء بسيط ، وقيمتك في الحياة بعد طبعا دينك وأخلاقك هو ... أنت زودت إيه في الحياة . فيه ناس بتعيش 30 سنة وبيخرجو من الدنيا بعد ما يكونوا غيروا فيها كتير ، وفيه ناس بتعيش 70 سنة وزي ما دخلوا زي ما خرجوا .

اتعلمت أني لا أعلم الكثير في الحياة ، وكلما ازددت علما ، ازددت علما بجهلي ،

تعلمت أن نظرتي للمستقبل قبل أن أقرأ التاريخ هي غير نظرتي للأمور وللحياة بعدما قرأت في التاريخ

تعلمت أن الأحزان لا تدوم وأن الأفراح لا تدوم

تعلمت أن الإنسان عندما يقع في مشكلة ، يعتقد أنها مصيبة ، ويعتقد أنها أكبر مصائبه ... لكن يزول كل ذلك مع الوقت .

تعلمت أن قيمة الإنسان لا يحددها المال ولا العلم ، وإنما الاخلاق . فهذه هي القيمة الحقيقية له .

كفاية كده لأن ده إللي جه على بالي .


ولنا بقيه...دا انت حبيبي

ماهو باين

واخر سؤال والمعروف

الكرسي ده بتاعك ولا جايبه من الكويت....ولا سالفه....ولاايه؟

بتسأل على الكرسي ليه .... لو محتاج الكرسي اتفضل اقعد ... انا لا أمانع إطلاقاااا

اما بالنسبه للعنوان

شارع راضي رزق وانت جاي من ناحيه النادي
اوشارع مركز الشبابا بس تجي من الخلف
او بقه من عند مسجد الرحمه لو كنت بتصلي العصر...المغرب لا:

ليه المغرب لأ ، هو البيت بيختفي مع الغروب وللا إيه ؟

مع تحياتي...
ابوحمدي2012

السلام عليكم ورحمه الله وبركاته

وعليكم السلام ورحمة الله وبركاته

ماذا تعرف عن الصوفيه


هل انت ممن يتردد علي لسانهم الذكر


الصوفية أعتقد أنها قتلت بحثا على الانترنت ، ويعني مش هنبحثها هنا في كرسي الاعتراف ، وبعد ما اتقفل باب النقاش هأفتحه تاني

أنا ما بأسمعش عن أي فرقة إسلامية فقط من أعدائها ، لكن بأسمع من كل الفرق الأخرى عنها

لذلك لن آخذ برأي المعارضين للوهابية

ولن آخذ برأي المعارضين للصوفية

ولن آخذ برأي المعارضين للشيعة ، بل سأعرض وجهة نظر كل فرقة ( من الفرقة نفسها ) على عقلي ثم أرى تطاحن الأدلة حول المسائل المختلف عليها . فكما قرأت عني ( مبدأ الشك هو أهم مبادئي ) . لذلك أرى الكثير من المبالغات ، فهؤلاء يرمون هؤلاء بالمتصوفة ، وهؤلاء يرمون هؤلاء بالنصابية وهؤلاء بالرافضية وهؤلاء بالمتمسلفة .

فأرجوك لا تفتح بابا سيربك الكثير من الأعضاء .

ما سر جمال مواضيعك

الله أعلم . وحتى اللحظة لا أعلم إذا كانت مواضيعي جميلة أم لا ، مع اعتقادي أنها عادية .

هل الاخلاص والنيه ام اشهار للذات

الله أعلم ، لكن ادع الله لي .

من افضل شيخ لك

لا يوجد شيخ خاص أدعوه أفضل شيخ ، وإن كان مغزى سؤالك أن تعلم إلى أي فريق أنتمي ، فأنا آخذ العلم من الآزاهرة بالذات الفتاوى ، وآخذ ترقيق القلوب من الصوفية ، وأستمع إلى مشايخ السلفية . فماذا أنا ؟

الاولياء الصالحين ماذا يمثلوا لك

سؤال يثبت لي افتراضي في الأسباب وراء سؤالاتك ، والتي تدور كلها حول اتجاهي الديني . وماذا يمثلون لك ؟

والاكثر زياره له من

عرف لي الولي .

سر اهتمامك بالمنتدي

راجع اجاباتي السابقة وراجع مواضيعي الخاصة .

هل تعتقد ان المنتدي يوما يشمل المحافظه باكملها

ليس هو في حد ذاته ، ولكن تطويره والامتداد له سيمشل أكثر من ذلك إن شاء الله .

هل ضاق صدرك لاسئلتي

ولماذا ؟. المهم ألا يضيق صدرك بإجاباتي .

كلمتين توجههم للمدير وللاشراف والاعضاء

المدير / توكل على الله واستمر ، وكما قلت لك من قبل لا تدع المنتدى فرصة لاستحواذ أي جهة فكرية أيا كانت ، بل ليظل متعدد الآراء متعدد الأقطاب ، وكما قلت لك من قبل ، لن أسمح طيلة وجودي في المنتدى من احتكار أحد بالرأي فيه .

للإشراف / لتكن لكم تلك القوة الناعمة التي من خلالها تستطيعون أن تحافظوا على التجانس في المنتدى والانسجام بجانب القضاء على بوادر الخلاف ، من أي فرد كان . ولا تنسوا أن ما يضيعنا دوما هو التهاون .

للأعضاء / أرجو منكم دعوة خالصة بظهر الغيب عسى أن يتقبلها الله ويصلح حالي .

اخوك مسلم